SOGએ સુરતમાં ફરી એક વખત ગેસ રીફિલિંગનું નેટવર્ક ઝડપી પાડ્યું
સુરતઃ સુરતમાં ફરી એક વખત ગેસ રીફિલિંગનું નેટવર્ક ઝડપાયું છે. કામરેજ તાલુકાના ઉંભેળ ગામમાં SOGએ ગેરકાયદે રીતે ધમધમતા ગેસ રીફિલિંગના કાળા બજારીયાઓ પર તવાઇ બોલાવી કાયદેસરની કાર્યવાહી હાથ ધરી છે. પોલીસે મોટી માત્રામાં ગેસના સિલિન્ડર પણ કબ્જે કરી તપાસ હાથ ધરી છે.
સુરત રૂરલ પોલીસે ઉંભેળના સારથી કોમ્પ્લેક્સમાં દોરડા પાડતા અહીંથી ઘરેલુ વપરાશના ૪૦ જેટલા ગેસના બાટલા મળી આવ્યા હતા. પોલીસને ગેસના સિલિન્ડર ઉપરાંત ગેસ રીફિલિંગ કરવાના સાધનો સહિત કુલ ૫.૩૦ લાખના મુદ્દામાલ સાથે ૩ શખ્સોની ધરપકડ કરી છે. આરોપીઓ આ સિલિન્ડર કામરેજ તાલુકાના સેવણી ગામના ડેપો પરથી લાવ્યા હોવાનું સામે આવ્યું છે. પોલીસે મંકેશ્વર ઉર્ફે મોન્ટુ પાંડે, સંજય રાજપૂત, રાજાસિંગ અજયસિંગ એમ ત્રણ આરોપીને ઝડપી પાડ્યા છે. આ ઉપરાંત સિલિન્ડર લાવી આપનાર જમશેદ નામના આરોપીને વોન્ટેડ જાહેર કર્યો છે.