300 વર્ષોથી નાગ પંચમીએ આ જગ્યાએ યોજાઈ રહ્યો છે અનોખો સર્પ મેળો, સાપની પૂજા કરવાથી પૂર્ણ થાય છે લોકોની મનોકામના

ભારત વિવિધ સંસ્કૃતિ ધરાવતો દેશ છે. દેશના વિવિધ પ્રાંતોમાં શ્રદ્ધા અને ભાવના સાથે અનેક મેળાઓનું આયોજન કરવામાં આવે છે. આવા મેળાઓ તો વર્ષો કે સૈકાઓથી યોજાતા આવ્યા છે, અને આજેય પણ આવા મેળા સાથે સ્થાનિકોની લાગણીઓ જોડાયેલી જોવા મળી રહી છે. આજે એવા જ એક મેળાની વાત કરીશું જે છેલ્લા 300 વર્ષોથી યોજાય છે અને તે છે અનોખો સર્પ મેળો.

હિન્દુ  પંચાગ મુજબ નાગ પંચમીના અવસર પર, બિહારના સમસ્તીપુર જિલ્લાના વિભૂતિપુર બ્લોકના સિંધિયા ઘાટ પર ગુરુવારે સાપનો અદ્ભુત મેળો યોજવામાં આવ્યો હતો. આ મેળાને મુલાકાતે અન્ય રાજ્યના લોકો અને આપણા પડોશી દેશના લોકો પણ આવતા હોય છે.

સમસ્તીપુરમાં દર વર્ષે નાગ પંચમીના દિવસે સર્પ મેળાનું આયોજન કરવામાં આવે છે.  અહીં યોજાતો   સાપનો મેળો દેશના અનોખા મેળા તરીકે ઓળખ ધરાવે છે. આ મેળામાં નાગ પંચમીના દિવસે ઝેરી સાપ પકડવાની પરંપરા છે. આ મેળો જોવા માટે બિહાર, ઉત્તર પ્રદેશ અને નેપાળ તેમજ અન્ય રાજ્યોના લોકો અહીં આવે છે. સમસ્તીપુરમાં આયોજિત આ અનોખા મેળાની શરૂઆત જિલ્લાના સિંઘિયા બજારમાં સ્થિત મા ભગવતીના મંદિરથી પ્રાર્થના કરીને થાય છે. આ પછી, ડ્રમ અને મૃદંગ સાથે, બધા ભક્તો સિંધિયા ઘાટ પર બુધી ગંડક નદી પર પહોંચે છે, જ્યાં પ્રાર્થના કર્યા પછી સાપ પ્રદર્શિત થાય છે.

પૂજારી ભગત શ્રીરામ સિંહ અને સુરેશ ભગતે જણાવ્યું કે નાગ પંચમીના અવસરે અહીં સાપનો આ અનોખો મેળો ત્રણસો વર્ષથી વધુ સમયથી યોજાય છે, જે દેશમાં સાપનો અનોખો મેળો છે. તેમણે કહ્યું કે એવું માનવામાં આવે છે કે જે પણ મંદિરમાં આવે છે અને સાપની પૂજા કરે છે, તેમની સિદ્ધિઓ અને મનોકામનાઓ પૂર્ણ થાય છે.