અફઘાનિસ્તાન ફરીથી ધ્રુજી ઉઠ્યું, હેરાત પ્રાંતમાં જોરદાર ભૂકંપ, 100 થી વધુ લોકો ઘાયલ

હેરાત: અફઘાનિસ્તાનના પશ્ચિમી હેરાત પ્રાંતમાં બે શક્તિશાળી ભૂકંપના કારણે 1,000 થી વધુ લોકોના મોત થયાના થોડા દિવસો બાદ બુધવારે સવારે તીવ્ર ભૂકંપના આંચકા અનુભવાયા હતા. ભૂકંપની તીવ્રતા રિક્ટર સ્કેલ પર 6.3 માપવામાં આવી હતી.

હેરાત શહેરથી 28 કિમી ઉત્તરે સ્થાનિક સમય અનુસાર આજે સવારે લગભગ 05:10 વાગ્યે ભૂકંપનો આંચકો અનુભવાયો હતો.  આરોગ્ય અધિકારીઓએ જણાવ્યું કે ભૂકંપના કારણે 100 થી વધુ લોકો ઘાયલ થયા છે અને તેમને સારવાર માટે હોસ્પિટલોમાં દાખલ કરવામાં આવ્યા છે.

અફઘાનિસ્તાનના લોકો શનિવારે આવેલા વિનાશક ભૂકંપમાંથી હજુ સાજા થયા નહોતા ત્યારે આજે સવારે ફરીથી જોરદાર આફ્ટરશોક્સનો સામનો કરવો પડ્યો. તાજેતરના ભૂકંપમાં ઘરો ધરાશાયી થયા બાદ ઘણા લોકો ખુલ્લામાં સૂતા હતા. સહાય એજન્સીઓએ કહ્યું છે કે ધાબળા, ખોરાક અને અન્ય પુરવઠાની પણ અછત છે.

અફઘાનિસ્તાન ઘણીવાર ભૂકંપથી પ્રભાવિત થાય છે. તે ખાસ કરીને હિંદુ કુશ પર્વતમાળામાં યુરેશિયન અને ભારતીય ટેકટોનિક પ્લેટોના જંકશન નજીક સ્થિત છે.